ဆရာတော်ဘုရားကြီး ဘဒ္ဒန္တဗုဒ္ဓရက္ခိတမဟာထေရ် တည်ထောင်တော်မူသော Mysore မြို့ရှိ - မဟာဗောဓိ ပရဟိတကျောင်း တွင်...ဗောဓိပင်၊ ဘုရားစေတီ၊ စာသင်ကျောင်းဆောင်၊ ကျောင်းသားများ နေထိုင်သည့်အဆောင်တို့ဖြင့် ဖွဲ့စည်းထားပါသည်။ ဤကျောင်းတွင် ကျောင်းအုပ် (၁)ယောက်၊ လက်ထောက်ကျောင်းအုပ် (၁)ယောက်၊ ဆရာဆရာမ (၂၀)ယောက်၊ ရုံးဝန်ထမ်း (၅)ယောက်နှင့် Switzerland မှ အကူအညီရုံးဝန်ထမ်း (၁)ယောက် တာဝန်ထမ်းဆောင်လျှက်ရှိပါသည်။ အဆောင်နေ ကျောင်းသား (၁၈၀)ယောက်ရှိပြီး အတွင်း+အပြင် ကျောင်းသားကျောင်းသူ စုစုပေါင်း (၃၂၀)ယောက် တက်ရောက်သင်ကြား လျှက်ရှိပါသည်။
စတင်တည်ထောင်စတွင် အဆောင်နေကျောင်းသား (၅၀)ခန့် လက်ခံပြီး နီးစပ်ရာစာသင်ကျောင်းများတွင် ပညာသင်ကြားစေခဲ့ သည်ဟု သိရပါသည်။ တစ်နှစ်လျင် ကျောင်းသား (၂၀)ခန့်အား အိန္ဒိယနိုင်ငံသား လူမျိုးစုံပါဝင်စေလျက် လက်ခံသင်ကြားပေး ပါသည်။ ပထမတန်းမှ ဆယ်တန်းအထိ သင်ကြားပေးပါသည်။ ဆယ်တန်းအောင်မြင်ပြီးသောကျောင်းသူကျောင်းသားများမှာ အိန္ဒိယနိုင်ငံရှိ မည်သည့်တက္ကသိုလ်မဆို ဆက်လက်ပညာသင်ယူနိုင်ပါသည်။ ယခုအခါ အပြင်ကျောင်းသားများကိုပါ သင့်လျော်သောငွေကြေးပမာဏကို ထည့်ဝင်စေလျက် သင်ကြားပေးနေသည်မှာ နှစ်နှစ်ခန့်ရှိပြီးဟု သိရှိရပါသည်။
ကျောင်းသူကျောင်းသားများမှာ နေ့စဉ် နံနက်ပိုင်းတစ်ကြိမ်- ညနေပိုင်းတစ်ကြိမ် ၁၀-မီနစ် ကမ္မဌာန်းထိုင်ကြရပါသည်။ အထူးအားဖြင့် ဗုဒ္ဓဟူးနေ့တွင် ၄၀-မီနစ် တရားထိုင်ကြရပါသည်။ ကမ္မဋ္ဌာန်းနည်းပြဆရာမှာ ဆရာကြီးဂိုအင်ကာထံတွင် ၁၀-နှစ်ခန့်မျှ တရားထိုင်ခဲ့ဘူးပါသည်။
လှုဒါန်းထောက်ပံ့သည့် နိုင်ငံများမှာ - Germany- Switzerland- Belgium- France- Spain- Netherlands- Austria- China- တို့မှ ဖြစ်ပါသည်။ စပွန်ဆာအလှုရှင် တစ်ဦးချင်းအလိုက် ကျောင်းသားတစ်ဦးစီကို တာဝန်ယူထားပါသည်။ စုစုပေါင်း စပွန်ဆာအလှုရှင် (၃၇၄)ဦးက ကျောင်းသူကျောင်းသား (၃၇၄)ယောက်ကို တာဝန်ယူထောက်ပံ့လျက်ရှိကြောင်း သိရှိရပါသည်။ ကျောင်းသူကျောင်းသားအားလုံး English Medium ဖြင့်သာ သင်ကြားကြရပါသည်။